عن الحب والغزل

Forums: 

رفقاتي بيقولولي هبلة، مجنونة، بحب حدا ما بعرفو ولا بعمري شايفتو، أنجأ سامعة صوتو عالتلفون كم مرّة! وكل شي بيقلي ياه ممكن يكوت مش مظبوط، على الأغلب مش مظبوط! مافي يكون مظبوط اذا كان في هالقد غموض بالموضوع وهالقد اسئلة من دون اجوبة وهالقد اجوبة مش منطقية! طيب اذا انا بعرف كل هالأشيا وما ناطرة جدا يخبرني ياها! ليش بحبو؟ وليش بيأثر فيني هلقد؟ ليش بكلمة بيقلبلي نهاري؟ ليش بنطرو تيرجع من شغلو واذا تأخر بجنّ؟ ههه هيدا اذا كان عنجد بيشتغل! اذا عنجد ما كان بلبنان! واذا عنجد كان اسمو متل ما مخبرني!
بحس معو بالأمان، بيخاف عليّي، بس ابكي قدامو بيجنّ! بس ازعل بيحتار كيف بدو يراضيني! بس الشك رح يقتلني! قصة الثقة حتجنّني! مع اني مش من النوع العاطفي يلي بيروح ورا قلبو، بالعكس تماما، انا بتبع عقلي مش قلبي بس بهيدا الموضوع ما بعرف ليش هيك عم اعمل.
 يلي بعرفو انو اوقات بقول خلص لازم تخلص هالمسرحية، لازم وقّف هبل! ايه بعترف هيدا اسمو هبل! برجع بقول مش قادرة اتركو. مش قادرة ابقى وحدي حتى لو بأحلامي بس، بنبسط انو معي... مع اني متأكدة انو مستحيل انا وهو نكون سوا شي نهار، بس بيضل هيدا الـ... الأمل يمكن؟ بيضل هيدا الأمل الضئيل موجود انو ربنا قادر يعمل عجايب وممكن نكون سوا اذا ربنا راد... الأيام وحدا كفيلة تكشف شو حيصير بيناتنا! بس الوقت عم يمرّ والنطرة عم تصير أصعب والصبر عم يخلص...

ياسمين

Popular post

Our portfolio

We wouldn't have done this without you, Thank you Bassem Chit - May you rest in power.

Copy Left

Contact us

Contact Sawt al' Niswa via:

You can also find us on: