By Yara Mansour
خلال زيارة لإحدى المراكز الاجتماعيّه ، ضمن دوام عملي، تفاجئت أول وصلتي بإحدى الموظفات، الممرّضة المسؤولة عن المركز، عم تبكي و تنتحب!!!
هيدي لي عم تناولا كلينكس وهيدي لي عم تراضيا، ومن الحديث فهمت إنو خطيبة خيّا بالمستشفى والعرس بعد شهر.
قلت بقلبي: أف هل أدّ بتحبا؟! وسألتا نشالله مش شي خطير؟
قال بعد ما طلعت نتيجة الفحوصات، بس إمّها معا مرض مزمن sclerose en plaqu، بركي طلع معها هي كمان !!
ورجعت تشهق بالبكي : يا دلّي عحظ خيي المعتّر ، وبعد شوي مسحت دموعا وقالت: كتّر خير الله إنو بعد ما تزوجو ،إذا فعلاً طلع مظبوط إحساسي وعندا هل مرض،،
لو بيّن بعد الجازه، مصيبة
شو بردّا ع بيت أهلا؟
هلأ صحيح القرار صعب بس بدو الواحد يحكّم عقلو .
وصل التمييز والعنف ضد النساء ، إنو نحاسب صبية على مرض يمكن مصابي فيه و نخربط مشروع حياة. بيخطر ع بالي سؤال : لو خيا هوي للّي كان مريض أو عندو مشكله معيّنة، ما كانت قتلت حالا هي وإمّا وعمّتها والعيله كلا تيلقولو شي بنت حلال ، ست بيت ، يزوجو ياها وتخدمو بأخرتو؟؟
وسؤال تاني : بركي هي بيوم من الايام مرضت، بتقبل ع حالا زوجا يردا ع بيت أهلا ويحرما من ولدا؟
بزمن وصل العنف والتمييز ل أقصى درجة بمجتمعنا، بزمن نساء عم تناضل كل يوم ل تاخد حقوقا، بزمن لازم تتحد في النساء وتتضامن مع بعضا، بتلاقي إنو في نساء ذكوريين أكتر من الرجال.
أجيال عم تتربى ع هل أفكار، وبدي احلم بوطن في مساواة؟ بصير فكر بستراتيجيّة عمل لنشر التوعية : من وين لازم بلّش؟
- بالمدارس،فكرة منيحة، بس بالمقابل في كتب القراءة ما بتفرجي الام إلّا بالمطبخ مع الوزرة ع خصرا وهي لي بتطبخ وبتكنس.
-بالامهات؟ كيف بوصلن؟وسائل الإعلان والبرامج، والله فكرة عظيمه، بس كيف؟ إذا كل الإعلانات بتشيّئ المرأة وبتنمّط دورها بمجتمعنا.
وإذا البرامج بتكون للتنكيت ع المرا لي بيضربا زوجا، أو مقدمين هالبرامج كلن ع شكل مالك مكتبي وصلت معن البلاهة والسّخافه يستقبلو مجرم شوّه مرتو لأن الأكلة ما عجبتو والتاني كسرلا اجرا لأن بدا تروح تزور أهلا.
لتفكير بتعّب بس ضروري, و الحلم اوقات كتير صعب يتحقّق بس اجمل شي انو الانسان يحلم
ف ايه رحّ ضلّ احلم بوطن المساواة.
Publisher:
Sawt al' Niswa
Section:
Category:
