لما ناس سألونى هنتقابل يوم الثلاثاء و لا بلاش علشان المظاهرات قلتهم و افرض يعنى مظاهرات ما هى اكيد مش هنحس بيها و هتخلص قبل الظهر… قد ايه كنت مش فاهمة قد ايه فاقدة الامل و جاهلة! بس دخلت ع الفيسبوك بليل و شفت اللى بيحصل و ما كنتش مصدقة…معقولة دول مصريين؟ بس قلت أكيد يوم و هيعدى و كنت غلطانة تانى… و عدى يوم الثلاثاء و الأربعاء و الدنيا بتولع: حماس، تضامن غريب بين الناس مشوفتوش فى بلدى غير فى ماتشات الكورة و فجاءة بدأت أسمع ان صحابى رجالة و ستات بيتشدوا… ايه ده هو الموضوع المرة ديه جد و لا ايه؟
و فجاة جتلى حالة مش هتصدقوها: انا غيرانة .. ايوه غيرانة جدا من الشباب و البنات و الرجالة و العواجيز اللى نزلوا ..طب يا بت هتفضلى قاعدة كدة بس تبعتى فى شعارات على النت؟ هو ده بقى الفيرتوال اكتيفيسم virtual activism ؟ عملت ايه انا فى وسط الناس ديه كلها؟ يعنى طول الوقت اشتكى من ام البلد و اقول عايزه اهج و ان مافيش فايدة و مفيش أمل … طب ما هو فيه امل اهه !! طب ما جت فرصه أقول رأيى بأعلى صوت فى الشارع ! ساكته ليه؟ خايفة ليه؟
بس كل ماقول هانزل.. خلاص مش قادرة.. افتكر ابنى… لازم لما يجى من الحضانة يلاقينى .. لو حصلك حاجة مش هتسامحى نفسك ابدا.. انت مصدر الأمان الوحيد بالنسبة له.. اعقلى و اتصرفى كأم مسئولة…غريزة الأمومة عندى أقوى من الشجاعة و أقوى من رغبتى الشديدة فى المشاركة فى صنع تاريخ بلدى.. بس ده كان امبارح
انا بحب ابنى فوق الوصف و عايزه ارجعله سليمة و انايمه فى حضن امه … انا خايفه و مرعوبة… انا جبانة من الآخر ..بس انا تعبت من الخوف و مش عايزة أربى ابنى على الخوف و القهر
زهقت من الخوف!!
بلاش تشدى مع الضابط اللى بيتنك عليكى احسن يطلع عينك… اديله سبوبة و خلصى
بلاش تردى على اللى بيتحرش بيكى احسن يطلعك مطواة أو يرشك بمية نار
بلاش تقفى للبلطجى اللى كسر عليكى احسن يطلع ابن حد كبير فى البلد
بلاش تتكلمى فى السياية علشان خاطر انتى ام وست و مش طلبة مشاكل
تعبت
تعبت من الخوف و القهر و الظلم
نفسى اعيش فى بلد تحترمنى و تحترم حقى فى التعبير و فى الاختيار و هى ديه مصر اللى عاوزة اربى ابنى فيها
علشان كده انا نازله بكره المظاهرات ان شاء الله… هاودى الواد فى أيد أمينة و انزل مع الناس اللى أكيد أشجع منى بس هاحاول اتعلم منهم يعنى ايه احترام الذات و الغير و يعنى ايه حرية و يعنى ايه وطنية.
هانزل و الله المستعان
رجاء أخير لكل واحد بيخاف على حد: لو حد حبيبك و غالى أو غالية عندك قالك أنا نازل بلاش تحبطه، بلاش تقول مافيش فايدة، سيبو أو سيبها يعيش التجربة ديه حتى لو مش هتكون بفايدة ، حتى لو هيتعرض لأذى … انا عارفة ان ده صعب و خصوصا لو كنت اب او ام زيى ..بس لازم تقهر خوفنا و لو مرة علشان تقدر نكمل عيشه فى البلد ديه، مهما كانت النهاية
و ربنا مع مصر
أم مصرية
Publisher:
Section:
Category:
