زوج صديقتي المش مجرم

Sawt al Niswa

ما حدا بيعرف ببيت الثاني شو في!

شو مظبوط هيدا القول، لمدة عشر سنين أنا ومتصورة إنو صديقتي مرتاحة مع زوجا وما عندن مشاكل، عندن عيلة حلوة وبحبو بعضن.

من فترة للتانيه كنت شوفا تعباني نفسياً وأوقات منهارة، بس ولا مرة خطر عبالي إنو عندا مشاكل زوجية.

كنت فكر إنو قعدت البيت ومسؤولية الولاد هني السبب، وأوقات كنت إحكم عليه، لما تقول أنها مش طايقة زوجها ولا سئلاني عنو، لأن إذا بتشوفو زوجها، وبتتعرفو عليه بتقولوا شو رايق، شو مهذب، شو تقي.

ما بقفي قداس، والصلاة فرض يومي عندو، مأمنلن كل شي بالبيت مش ناقص شي.

وهيدا الرجال يلي هلق وصفتلكن ياه، مش انسان، والحيوان أحسن منو، هيدا المخلوق بيغتصب أعز إنسانة ع قلبي، مرتو !!!

بالصيفية لي مرقت كان عندا صديقتي عملية جراحية لبيت الرحم، ولما كنت عم زورها ببيتها لقيتها منهارة وعام تتمنى الموت وكانت أول مرة بتفش خلقها وبتحكيلي الحقيقة. قبل بليلة من العملية تحمم المسيو وعيطلا ع غرفة النوم ،متل كل مرة،: “يلا شلحي تيابك وعجلي شوي ” ذكّرتو إنو عندا عملية ومزعوجي وموجوعة، بس ما فرقت معو “ايه وشو يعني، ما بكفي رح تبقي يومين بالمستشفى، خلصيني بلا غنج كلن عشر دقائق، ما طليعلي صوتي“!!

عشر دقايق بكي وعذاب وإحساس بالإحتقار، عشر دقايق إغتصاب !ما خلصت الخبرية هون، أول ليله رجعت عل بيت من المستشفى، كمان جبرها تنام معو ، قالتلي” ترجيتو و ما فرقت معو، فرجيتو الجرح والقطب وما كان يحس“.وبعد شهر ونص تقريباً بتتصل فيي عم تبكي وبتخبرني أنها حبلي، ولو شو ما صار ما بدا الولد.

شجعتها إنو تجهض هل جنين وتعمل يلي بدا ياه، شجعتها تواجه زوجها وهي تاخد القرار.

قهرها وعذيبها قوّها وراحت عند طبيبها وطلبت الاجهاض، أول شي بهدلا الطبيب كيف بتحبل بعد العملية وكان نبهن ممنوع الحبل قبل ست أشهر ورجع عملا وعظة عن الإجهاضخبرتو الحقيقة، تفهم وضعها وأجهضت الطفل.

أكيد زوجا ما كان موافق عل إجهاض لأنو “خطية“، وبضل يقلا “إنت خاطيي والله ما راح يسامحك ع للي عملتي“شو هل مهزله!? بنظرو الإجهاض خطية بس الاغتصاب لأ، وبنظر دولتنا وأديانا نفس الشي، الاجهاض جريمة بس الإغتصاب الزوجي لأ.

هيدا لي اسمو مجتمع خبيث.

صديقتي ما خلصت قصتها هون، بعدها تحت رحمة زوجها وقادر بكل سهوله يهددا بولدها تيجبرا تنام معو، تيغتصبا.

 

ويمكن هي تمردت ورفضت تربي ولد حبلت في نتيجة إغتصاب، بس كم مرا بمجتمعنا قادرة تعمل متله؟؟؟

Publisher: 

Sawt al' Niswa

Section: 

Category: 

Featured: 

Popular post

Our portfolio

We wouldn't have done this without you, Thank you Bassem Chit - May you rest in power.

Copy Left

Contact us

Contact Sawt al' Niswa via:

You can also find us on: